روايات وقصص

جوز أختي

أنا مسافرة من الصعيد للقاهرة كان كل همي أطمن على منيرة أختي، مكنش في دماغي أبداً إن السكة دي هتنتهي بالشكل الغريب ده. من يوم ما أمنا الله يرحمها ماتت ومبقاش لينا في الدنيا دي غير بعض، منيرة اتجوزت واحد من القاهرة وعاشت معاه هناك وكل امورها كانت تمام.

بس من كم شهر كده الحال اتغير، كل ما أتصل أطمن عليها ألاقي صوتها تعبان ومهزوز ومش قادره تنطق كلمتين على بعض، وتقولي إنها عيانة جداً ومش قادره تتكلم. قلبي كان بيتقطع عليها وكل يوم أكلم جوزي وأقوله لازم أروح أطمن على أختي بنفسي.

اتصلت بيها وقلت لها أنا جايه لك يا منيرة بكرة، حسيت بتردد غريب في صوتها وكأنها بتتلعثم وعايزة تمنعني أجي، بس رجعت وسكتت وقالت لي تمام يا حبيبتي تعالي تنوريني بس ابقي رني عليا قبل ما توصلي بنص ساعة بالظبط. استغربت طلبها ده وفضلت أسأل نفسي هي ليه عايزة ميعاد محدد، بس رجعت وقلت لنفسي عيب دي أختي والبيوت أسرار، يمكن الشقة مش مترتبة ولا تعبانة ومش قادرة تقوم تروق، فقلت لها خلاص ماشي ولا يهمك.

يوم السفر ركبت القطر والتوتر كان ماكل قلبي، طول الطريق وأنا باصة في الشباك وبدعي ربنا تطلع كويسه وميكونش فيها حاجة وحشة، ومن كتر القلق والتفكير نسيت تماماً حكاية إني أرن قبلها بنص ساعة، ولقيت نفسي قدام الباب خبطت خبطتين خفاف وأنا ببتسم ومستنية الباب يفتح وأحضنها.

بس دقيقتين ولقيت الباب بيفتح ببطء وشوفت حماتها قدامي، أول ما عينها جات في عيني وشها اصفر وباهت كأنها شافت عفريت، ومن غير سلام ولا حتى أهلاً وسهلاً لقيتها بتزعق فيا بصوت مخنوق وبتقولي بخضة واضحة: انتي.. انتي إيه اللي جابك دلوقتي؟ إنتي متصلتيش ليه قبل ما تيجي زي ما اتفقنا؟ اتفاجئت من طريقتها ونبرة صوتها اللي فيها قلق غريب، ولسه هعتذر وأقولها معلش نسيت وكنت مستعجلة عشان أشوفها، لقيتها بتقاطعني بعصبية وهي بتزقني لبره وبتقولي: روحي دلوقتي وتعالي مرة تانيه.. منيرة نايمة دلوقتي.

الصدمة نزلت عليا زي القلم، هما إزاي يقولوا كده وهما عارفين مشواري من الصعيد لحد هنا، وكمان منيرة كانت عارفة ومستاذنة منها قبل ما أتحرك من بلدي، ولسه هرد سمعت صوت جوز أختي جاي من جوه البيت وهو بيقول: مين يا أمي، مين على الباب؟ أمه بصت وراها وقالت له بسرعة: مفيش دي أخت مراتك.. بس هتمشي دلوقتي وتيجي وقت تاني، ولسه بتمد ايدها تقفل الباب في وشي بقوة، حسيت إن روحي بتتسحب وحطيت أيدي بكل قوتي على باب الشقة ومنعتها تقفله، وصرخت فيها وأنا ملامحي متغيرة وبقولها: إيه اللي بيحصل جوه هنا؟ ومنيرة أختي فين عايزة أشوفها بنفسي.

حماتها زعقت بصوت عالي وقالت لي بحدة وغضب: هتكون فين يعني؟ ما قلت لك عيانه ونايمه ومرهقة ومش هينفع نصحيها دلوقتي، روحي شوفي لكي حتة استريحي فيها لحد ما نبقى نكلمك.

بس أنا مبقاش عندي طاقة أسمع كلام تاني، وجوه قلبي نار بتتحرك، دفعتها بقوة من قدامي ودخلت الشقة جري زي المجنونة. حماتها جريت ورايا وهي بتصرخ وعايزة تلحقني وتشدني، بس كنت سبقتها ودخلت وياريتني ما دخلت!

مصدقتش اللي شافته عنيا وقتها، صدمة متتوصفش خلت جسمي كله يقشعر ومقدرتش أنطق بحرف واحد!

أول ما دخلت الصالة، رجلي اتسمّرت في الأرض، وحسيت إن نفسي اتسحب من صدري. لقيت منيرة أختي قاعدة على كرسي جنب الحيطة، لابسة هدوم بيت قديمة، وشكلها متغير تماماً. وشها أصفر، وعينيها غايرة، وشعرها منكوش، وإيديها مربوطة بقطعة قماش في دراع الكرسي!

صرخت من غير ما أحس بنفسي: منيرة!!! إيه اللي عملوه فيكي يا حبيبتي؟!

جريت عليها وأنا مش مصدقة اللي شايفاه، لكن حماتها لحقتني ومسكتني من دراعي بعنف وقالت: إنتي اتجننتي؟! ابعدي عنها!

بصيت لها بصدمة وقلت: إنتي ربطاها ليه؟! دي أختي ولا أسيرة عندكم؟!

وفي اللحظة دي جوز أختي خرج من الأوضة، ولما شافني واقفة جنبها اتلخبط وقال: إنتي دخلتي هنا إزاي؟ مش المفروض كنتي تتصلي قبل ما تيجي؟

بصيت له وأنا دموعي نازلة وقلت: يعني إنت كمان كنت عارف؟! كنتوا مخبيين أختي عني ليه؟!

قرب مني وقال بنبرة حاول يخليها هادية: اهدي بس، الموضوع مش زي ما إنتي فاهمة، منيرة تعبانة نفسياً ومش في وعيها، وإحنا بنحاول سيطرة عليها عشان متأذيش نفسها.

بصيت لمنيرة، ولقيتها بتحاول تتكلم، لكن صوتها كان ضعيف جداً، ودموعها بتنزل وهي بتحرك راسها بالنفي.

قربت منها وفكيت القماشة من إيديها، وفضلت أطبطب عليها وأقول: متخافيش يا حبيبتي، أنا جيت، ومش همشي من غيرك.

فجأة مسكت إيدي بكل قوتها، وقالت بصوت متقطع: خدي بالك… خدي بالك من…

وقبل ما تكمل، حماتها صرخت فيها: اخرسي بقى! إنتي لسه هتعملي لنا فيها ضحية؟!

لفيت لها وقلت: كلمة واحدة كمان وهتصل بالشرطة حالاً!

جوز أختي حاول يتدخل وقال: إنتي مش فاهمة حاجة، دي بقالها شهور حالتها مش طبيعية، بتزعق وتكسر وتتهم الناس بحاجات غريبة، وإحنا صابرين عليها بالعافية.

قلت له: طب ليه محدش فيكم فكر يتصل بيا ويقولي إن أختي وصلت للحالة دي؟ أنا أختها الوحيدة!

سكت، وبدأ يبص لأمه، وهي بدورها بصت له بنظرة فهمت منها إن فيه حاجة أكبر من مجرد مرض.

قررت إني أخرج من المكان ده بأختي الأول، وبعدها أفهم كل حاجة. ساعدتها تقوم، وكانت رجليها بتترعش ومش قادرة تشيلها، ولما سندتها على كتفي حسيت إنها خفت بشكل يخوف.

لكن أول ما وصلنا عند باب الشقة، حماتها وقفت قدامنا وقالت: محدش هيخرج من هنا!

طلعت موبايلي وقلت: أنا مش بهزر، هتصل بالشرطة.

هنا جوز أختي اتغير تماماً، وقرب مني وقال: استني، أنا هفهمك كل حاجة، بس بلاش فضايح.

رديت عليه: الفضايح عملتوها بإيديكم، مش أنا اللي عملتها!

خرجنا بالعافية، وركبنا تاكسي، وطلبت من السواق يودينا لأقرب مستشفى. طول الطريق وأنا حاضنة أختي، وهي تبكي من غير صوت.

في المستشفى الدكتور كشف عليها، وطلب تحاليل وأشعة، وبعد شوية دخلني مكتبه وقال لي إن أختي عندها أنيميا شديدة وسوء تغذية وجفاف، وإن حالتها محتاجة متابعة وعلاج، وسألني إذا كانت بتاخد أدوية بانتظام.

قلت له: والله يا دكتور أنا معرفش، أنا من الصعيد ومشفتهاش من شهور.

قال لي: لازم تعرفوا إيه اللي حصل لها، لأن حالتها مش مجرد تعب عادي.

بعد ما اطمنا إنها بقت تحت رعاية الأطباء، دخلت لها الأوضة. كانت فاقت شوية، وأول ما شافتني مدت إيدها ناحيتي وعيطت.

قعدت جنبها وقلت: احكيلي يا منيرة، إيه اللي حصل؟ وليه كنتي خايفة إني أجيلك؟

بصت لي وقالت: أنا كنت عايزة أقولك، بس مكنتش عارفة أتكلم قدامهم… كل ما أمسك التليفون حماتي تاخده مني، وجوزي يقولي إني ببالغ وإن محدش هيصدقني.

حسيت بوجع في قلبي وقلت: طب إيه اللي حصل؟ إنتي كنتي كويسة، إزاي وصلتي لكده؟

أخدت نفس طويل وبدأت تحكي. قالت إنها من حوالي ست شهور اكتشفت إن جوزها باع دهبها من غير ما يقولها، ولما واجهته حصلت مشكلة كبيرة بينهم. وبعدها حماتها بدأت تدخل في كل تفاصيل حياتها، وتمنعها من الخروج لوحدها، وتقول لجوزها إنها مش طبيعية وبتعمل مشاكل.

السابق1 من 2
تابع المقال

Leave a Reply

Your email address will not be published. Required fields are marked *

Back to top button